لەبارەی دابڕان/ پەیوەندی/

لە 2020 دا حەوت مامۆستای ئایینی بە كۆرۆنا گیانیان لەدەستداوە

12/08/2020


دوای ئەوەی یەكێتی زانایانی ئایینی ئیسلام لە كوردستان، ماوەیەك لەمەوبەر  رایگەیاند، لە سەرەتای 2020 ەوە  45 مامۆستای ئایینی بەهۆی ڤایرۆسی كۆرۆناوە گیانیان لەدەستداوە، بەرپرسێكی یەكێتی زانایان ژمارەی ئەو مامۆستا ئایینیانە ئاشكرا دەكات كە بەهۆی ڤایرۆسی كۆرۆناوە گیانیان لەدەستداوە.

مەلا عەبدوڵا شێركاوەیی، بەرپرسی راگەیاندنی یەكێتی زانایانی ئایینی ئیسلام لە كوردستان، لە لێدوانێكدا بە ماڵپەڕی دابڕانی راگەیاند "لەسەرەتای سەرهەڵدانی ڤایرۆسی كۆرۆناوە لە هەرێمی كوردستان، تا ئێستا حەوت مامۆستای ئایینی دوای ئەوەی تووشی كۆرۆنا بوون گیانیان لەدەستداوە".

وتیشی "هۆكاری مردنی مامۆستا ئایینیەكانی دیكە لە ئەمساڵدا جۆراو جۆر بووە".

پێشتر، عەبدوڵا مەلا سەعید، سەرۆكی یەكێتی زانایانی ئایینی ئیسلام لە كوردستان بە ماڵپەڕی یەكێتی زانایانی راگەیاندبوو "لەساڵی 2020 رێژەیەكی زۆر زاناو مامۆستای ئایینی كۆچی دواییان كردووە، ئەمە وێرای رازی بوون بە قەدەری خوای گەورە بەڵام خەسارەتێكی گەورەیە لەناو كۆری زانایان، چونكە ئەوان پێشەنگی میللەتن لەرووی دینداری و گەیاندنی پەیامی ئیسلام".

سەرۆكی یەكێتی زانایان ئەوەشی خستبووەڕوو "هۆكاری وەفاتی ئەو مامۆستایانە زۆربەیان بەهۆكاری تەمەن و نەخۆشیەوە بووەو هەندێكیشیان بەهۆی ڤایرۆسی كۆرۆنا گیانیان لەدەستداوە".

پێشتر زۆرێك لە مامۆستایانی ئایینی كە سەرەتا ڤایرۆسی كۆرۆنا لە چین و چەند وڵاتێكی دیكە بڵاوبوویەوە، ڤایرۆسەكەیان بە سەربازی خودا ناودەبرد، ئاماژەیان بەوەدەدا ئەو ڤایرۆسە دژ بە بێ باوەڕانە و تۆڵەی خودایە لەبەرامبەر چەوساندنەوەی موسوڵمانان، بەڵام پاش ماوەیەك ڤایرۆسەكە لە سەرجەم وڵاتانی ئیسلامیش بڵاوبوویەوە.

نوێترین

© 2016 Dwryan.net. All Rights Reserved.
Developed by Avesta Group and powered by Microsoft Azure