سەرەتا/ لەبارەی دابڕان/ پەیوەندی/

وڵاتانی موسوڵمان بێ كێشە ڤاكسینی كۆرۆنا بەكاردەهێنن
بەڵام مامۆستایەكی ئاینی لە هەرێم ئامۆژگاری خەڵك دەكات بەكارینەهێنن

29/07/2021


مامۆستایەكی ئاینی ئامۆژگاری خەڵك دەكات ڤاكسینی دژ بە كۆرۆنا بەكارنەهێنن، لەكاتێكدا لەسەرجەم وڵاتانی جیهان بە وڵاتانی موسوڵمانیشەوە ڤاكسین بەكاردەهێندرێت، پێشتریش یەكێتی زانایانی ئاینی لە كوردستان فەتوای داوە كە بەكارنەهێنانی ڤاكسین هەرچییەكیشی تێدابێت گوناهە.

 

" ڤاكسینی كۆرۆنا جەلاتینی بەرازی تێدایە، مەلا هەیە فەتوای داوە كە ڤاكسینی كۆرۆنا بدەن لە خۆتان، بە دەنگ لامە كە وتوویەتی دروستە"
مەلا هەڵۆ كە مامۆستایەكی ئاینییە و لەسلێمانی و بەشێك لە هەرێمی كوردستان شوێنكەوتوویی هەیە، لەوتارێكدا بۆ شوێنكەوتوانی دەڵێت " ڤاكسینی كۆرۆنا جەلاتینی بەرازی تێدایە، مەلا هەیە فەتوای داوە كە ڤاكسینی كۆرۆنا بدەن لە خۆتان، بە دەنگ لامە كە وتوویەتی دروستە".

 

وادیارە مەلا هەڵۆ ئاگاداری فەتوایەكی یەكێتی زانایانی ئاینی ئیسلام نییە 
وادیارە مەلا هەڵۆ ئاگاداری فەتوایەكی یەكێتی زانایانی ئاینی ئیسلام نییە كە لە 14/4/2021 سەبارەت بە ڤاكسینی كۆرۆنا دەریان كردووە، بەپێی فەتواكە بەكارنەهێنانی ڤاكسین دەچێتە چوارچێوەی گوناهەوە.
وتەكەی مەلا هەڵۆ لەكاتێكدایە لە وڵاتانی سعودیە و سەرجەم وڵاتانی موسوڵمان ڤاكسینی كۆرۆنا بەكاردەهێندرێت و هیچ مامۆستایەكی ئاینیش دژی بەكارهێنانی ڤاكسینەكە لەو وڵاتانە بەئاشكرا نەوەستاوەتەوە، ڤاكسینەكەش لەلایەن وڵاتانی ڕۆژئاوایی و چینەوە دروست كراوە و هیچ وڵاتێكی موسوڵمان نەیتوانیوە ڤاكسینێكی دژ بە كۆرۆنا بەرهەم بهێنێت.

 

"لە روانگەی شەرعەوە، بونی ماددەیەكی حەرام لەناو پێكوتەكە، وەك ماددەیەكی حەرام تەماشا ناكرێت"
پێشتر مەلا عەبدوڵا وەیسی سەرۆكی یەكێتیی زانایانی ئایینی ئیسلام رایگەیاندبوو "لە روانگەی شەرعەوە، بونی ماددەیەكی حەرام لەناو پێكوتەكە، ماددەی بەراز بێت یان هەر چییەكی دیكە بێت، نابێتە هۆی حەرامبونی پێكوتەكە، ماددەكە ناوەكەی لەسەر نەماوە و لەو حاڵەتەدا وەك ماددەیەكی حەرام تەماشا ناكرێت".

 

 "پێكوتە پێویستییەكی شەرعییە و هەر كەسێك بەكارینەهێنێت دەچێتە سنوری گوناهبارەوە"
سەرۆكی یەكێتیی زانایان راشیگەیاند"بەكارهێنانی پێكوتە پێویستییەكی شەرعییە و هەر كەسێك بەكارینەهێنێت دەچێتە سنوری گوناهبارەوە".
دوای بڵاوبونەوەی دەنگۆی بەكارهێنانی ماددەی بەراز لە دروستكردنی ڤاكسینی كۆرۆنا، بەشێك لە موسوڵمانان پێیانوابوو بەكارهێنانی ڤاكسین حەرامە، لە مالیزیا هەمان گرفت ڕوویدا، كاتێك لە 2018 وتیان ڤاكسینی سورێژە حەرامە، ئەمەش وایكرد خەڵكی ئەو وڵاتە ڤاكسین بۆ منداڵەكانیان بەكارنەهێنن، ئەو ساڵەش ژمارەی حاڵەتەكانی سورێژە گەیشتە لوتكە، بەوهۆیەوە سێیەم زۆرترین حاڵەتەكانی سورێژە لە جیهاندا لە مالیزیا تۆماركرا. 

 

"تەنانەت ئەگەر ڤاكسینێك ماددەیەكی رێگەپێنەدراوی تێدابێت بۆ گواستنەوە و دروستكردنیشی و دواتر بە پاكی دروستبكرێت رێگەپێدراوە"
پێشتریش محەممەد عەسری موفتی و سەرپەرشتیاری ئایینیی مالیزیا لەبارەی بەكارهێنانی ڤاكسین رایگەیاندبوو "با دۆخەكە ئاڵۆز نەكەین كە بە بچوكی بیری لێبكەینەوە، چونكە ئەگەر شتێك بۆ گشتی و نەتەوەیەك بێت، دەبێت رێكبخرێت و ئاسانكاری بۆ بكرێت".

محەممەد عەسری دەشڵێت:"ئەگەر ڤاكسینێك لە پێكهاتەی حەڵاڵ دروستبكرێت باشترینە و یەكەم بژاردە دەبێت، بەڵام تەنانەت ئەگەر ڤاكسینێك ماددەیەكی رێگەپێنەدراوی تێدابێت بۆ گواستنەوە و دروستكردنیشی و دواتر بە پاكی دروستبكرێت رێگەپێدراوە".

 


نوێترین


کاریکاتێر

وێنەهەواڵ

© 2016 Dwryan.net. All Rights Reserved.