لەبارەی دابڕان/ پەیوەندی/

با گوندەكان نەبنە مۆڵگەی داعش

13/08/2020



ئازاد ئیبراهیم

دەبێت بڵێین بە داخەوە لە چەند شەوی ڕابردوودا لە گوندێكی خوارووی خانەقین و وەك پیشەی چەندەمینجاریان تیرۆریستان و شەمشەمە كوێرەكانی داعش دیسان بە دنیابینییە ڕەش و تاریكەكەی خۆیان پێشمەرگەیەكیان شەهید كرد و تیرۆریستانی داعشیش هەڵهاتن بۆ شوێنێكی نادیار. ئەوەی مایەی هەڵوەستە لەسەركردنە ئەوەیە كەس نازانێت ئەم تیرۆریستانە لەكوێوە دێن و دەردەكەون و كردەوە قێزەوننەكانیان ئەنجام دەدەن و دواتر بۆ كوێ هەڵدێن و لەكوێ خۆیان دەشارنەوە و ئەو لایەن و كەسانە كێن هاوكاری داعشن بۆ خۆشاردنەوە؟

پرسیار لەسەر شوێنی نوێی تیرۆریستانی داعش و هاوكاری هەندێك گوندو ناوچەی عەرەبی بۆ داعش و بەهێزبوونی داعش لەسایەی خێڵ و هۆزەكانی ناوچەكەدا، یەك لەو گومانانەیە چۆن سوپای عێراق كێوماڵی ئەم تیرۆریستانە ناكات لەكاتێكدا یەك ڕۆژ دوای دەستبەكاربوونی (مستەفا كازمی) وەك سەرۆك وەزیرانی نوێ بڕیاری كێوماڵكردنی داعشی دەركردو لەهەندێك ناوچەیش پرۆسەكە چووە بواری جێبەجێكردنەوە؟
ونبوونی داعش لە ڕیزی هاوڵاتیانداو تێكەڵبوونیان بەهاوڵاتی گوندنشینەكان، سەرەداوی حەقیقەتێكە كە داعش لەدوو ئەگەردا بەردەوامە:

یەكەم / یان داعش تەنها ڕەمزێكی تیرۆرەو ماوەتەوەو ئەوەی ئەم كردەوانە ئەنجام دەدات هاوڵاتیان و گوندنشینان خۆیانن و عوقدو نێتی خراپی ناسیۆنالیستی و خێڵەكی پاڵیان پێوەدەنێت و ئەم كردەوانە ئەنجام دەدەن.

دووەم / یان بەڵێ ئەنجامدەرانی ئەم كردەوەیە تیرۆریستانی ڕاستەقینەی داعشن و لەڕیزی هاوڵاتیان یان گوندنشیناندا ماونەتەوە و لە ڕێگای هەڕەشەو ترساندنەوە وایان لەهاوڵاتیان كردووە كە نەتوانن شوێنی داعش بۆ هیچ هێزێكی كوردی یان عێراقی ئاشكرا بكەن.

هەر یەكێك لەو دوو ئەگەرەی سەرەوە، وادەكات هێشتا ناوی داعش لەناواندا بێت و چاوەكان تەنها لەسەر جوڵەی داعش و دەركەوتنی داعش بێت، لەبەرامبەریشدا بێئاگاییەكی تەواو هەیە لەئاست هەموو ئەو نێتە خراپ و شەڕەنگێزی و ویستە خێڵەكی و ….هتدەی دەیەوێت ئەمنییەتی ناوچەكە تێك بدات.

باشترین مەقاشێك بتوانێت لەنێو ئاگرو كورەی ئەم جەنگەدا تیرۆریستانی داعش و چەكدارە نامۆو نەناسراوەكان دەربهێنێت و ڕیشەكێشیان بكات ئەوەیە؛ هێزی نهێنی دژ بەم چەكدارانە بخزێنرێتەنێو هاوڵاتیانی گوندەكانی ئەو ناوچانەوە و گەرای دژە داعش و هەر نێتێكی دیكەی دژە كورد و كوردستانی كەشف بكات و هەموو ئەو پیلانانەی دژی پێشمەرگە لەئارادایە پوچەڵ بكەنەوەو چیتر خوێنی پێشمەرگەو هاوڵاتی كوردی ناوچەكە نەڕژێت بەبێ هۆ و لەخۆڕا.

ئەگەر وردتر لەم دۆخەدا، بەراوردی نێوان ئێستای داعش بكەین لەو ناوچانەدا بەبەراورد بەبوونی هێزەكانی پێشمەرگە لەسەردەمی شاخدا، دەبینین كە، سەرەڕای ئەوەی پێشمەرگە خەباتێكی پیرۆزی دەكرد و لە پێناو مافەكانی كورد تێدەكۆشاو تەواوی خاكەكەیش هی خۆی بوو، كەچی بەعسی خوێنمژی فاشیست هەم جاشەكانی دژی پێشمەرگە بەكاردەهێناو هەم ڕەبییەو بنكەی ئیستیخباراتی لەگوندەكانی كوردستاندا دروست كردبوو، تەنانەت ڕێگاوبان قیرتاوكردنی گوندەكان لەلایەن بەعسەوە نیشانەی دڵسۆزی بەعس نەبوو بۆ كوردو گوندنشینان و ناوچە كوردنشینەكان، بەڵكو بۆ ئەوەبوو بتوانێت بەتەواوەتی كۆنترۆڵی ناوچەكە بكات و ڕێگری لەهەموو چالاكییەكی پارتیزانی هێزەكانی پێشمەرگە بكات، لەگەڵ هەموو ئەمانەشدا بەعس دەیویست جاسووس و پیاوەكانی خۆی بخزێنێتەنێو ڕیزەكانی خێزانەكانیشەوەو زۆرجار ژنەفتومانە كە باوك و براكان نەیاندەوێرا لەلای یەكتریشدا خراپەی بەعسییەكان باس بكەن.

بۆئەوەی گوندەكان نەبنە مۆڵگەی داعش و چیتر كردەوە تیرۆریستییەكانی داعش و هاوشێوەكانی بەردەوامیان نەبێت، دەبێت خودی گوندەكان بكرێتە ناوچەیەكی ترسناك و نادڵنیایی لەلای تیرۆریستانی داعش، دەبێت هەموو خاڵە دوورمەوداكان و بچڕاوەكان لەنێوان ناوچەو گوندەكانی نێوان هەرێم و ناوەنددا بگەیەنرێتەوە بەیەكترو هەموو پانتاییە ماوە دوورو فراوانەكان بگۆڕدرێت بەجێگای سەربازی و ئەمنی تاكو چیتر داعش نەتوانێت بەویستی خۆی ئەو پانتایی و بیابان و ناوچە چۆڵ و كاكی بەكاكییانە نەكاتە شوێنێكی پڕ دڵنیایی و سەلامەت بۆ خۆیان.

نوێترین

© 2016 Dwryan.net. All Rights Reserved.
Developed by Avesta Group and powered by Microsoft Azure